Presidenti i Shteteve të Bashkuara të Amerikës, Donald Trump, iu rikthehet sulmeve të ashpra ndaj Papa Leonit XIV. Kreu i Shtëpisë së Bardhë e akuzoi Papën se “po vë në rrezik shumë katolikë”. "Mendoj se Papa po vë në rrezik shumë katolikë dhe shumë njerëz, pasi mendoj se nëse do të varej prej tij, ai do të ishte plotësisht dakord që Irani të ketë një armë bërthamore”. Komentet e Presidentit Donald Trump erdhën dy ditë para se Sekretari Amerikan i Shtetit, Marco Rubio, të takohet me Papa Leonin XIV në Vatikan, në një përpjekje për të zbutur tensionet e shkaktuara nga reagimi i mëparshëm i Trump ndaj Papës amerikan, për dënimin e tij të luftës SHBA-Izrael kundër Iranit. Teksa fliste për Papën gjatë intervistës, Presidenti Trump foli dhe për përshkallëzimin e tensionit në Lindjen e Mesme, duke thënë se “Irani dëshiron të bëjë marrëveshje”, por shtoi se ata po luajnë lojëra. Vetë Papa nuk ka reaguar pas sulmit të fundit të Trump, por Sekretari i Shtetit të Vatikanit, kardinali Pietro Parolin tha se Papa po bën atë që i kërkon roli i tij, të predikojë paqen. “Papa vazhdon punën e tij, duke predikuar Ungjillin dhe paqen. Ne e kuptojmë se jo të gjithë janë në të njëjtën linjë, por kjo është përgjigja e Papës”. Që na marrja e detyrës, Papa Leoni XIV nuk ka thënë asnjëherë se Irani duhet të ketë armë bërthamore, por ka kundërshtuar vazhdimisht luftën ndaj vendit dhe përshkallëzimin e mëvonshëm të konfliktit në Liban dhe në të gjithë Lindjen e Mesme, duke bërë thirrje për armëpushim dhe dialog.