Përplasja mes Elon Musk dhe Donald Trump ka hyrë në një fazë të re, më të ashpër dhe publike se kurrë më parë. Një debat që nisi me mospajtime të vogla për subvencionet dhe politikat fiskale, tani është shndërruar në një përballje të hapur mes një prej miliarderëve më të fuqishëm të botës dhe presidentit amerikan. Shkëndija e radhës u ndez pas miratimit të ligjit të buxhetit të propozuar nga presidenti Trump, i cili kaloi në Senat falë votës vendimtare të zëvendëspresidentit Vance. Me një rritje rekord të tavanit të borxhit me plot 5 trilion dollarë, projektligji u kritikua ashpër nga Musk, i cili në një postim në platformën X shkroi: “Është e qartë, me shpenzimet e çmendura të këtij projektligji, se jetojmë në një vend me një parti të vetme, partinë e derrkucit me kollare.” Përgjigjja nga Trump nuk vonoi. Në një deklaratë thumbuese, ai i sugjeroi Muskut që “të mbyllte dyqanin dhe të kthehej në Afrikën e Jugut”, nëse nuk do të kishte më akses në subvencionet për makinat elektrike. Dhe kur u pyet nëse mund të shqyrtohej edhe deportimi i tij, ai u përgjigj shkurt: “Do ta shoh.” Por Musk nuk u ndal me kaq. Ai i drejtoi një tjetër sulm Kongresit amerikan, duke thënë: “Çdo anëtar i Kongresit që bëri fushatë për të ulur shpenzimet e qeverisë dhe më pas votoi menjëherë për rritjen më të madhe të borxhit në histori duhet të ulë kokën nga turpi! Dhe do ta humbasin garën në primare vitin tjetër, edhe nëse është gjëja e fundit që bëj në këtë jetë.” Deklaratat e tij u intensifikuan më tej gjatë ditës. Në një tjetër postim në X, ai paralajmëroi: “Nëse ky projektligj i çmendur për shpenzime miratohet, Partia e Amerikës do të themelohet ditën tjetër.” Trump, nga ana tjetër, kaloi në kundërsulm. Në një postim ai paralajmëroi se do të urdhërojë Departamentin për Efiçencën Qeveritare (DOGE), një institucion që vetë Musk e kishte ndihmuar të themelohej për të kontrolluar shpenzimet, të nisë një hetim kundër miliarderit. “Elon mund të ketë marrë më shumë subvencione se çdo njeri tjetër në histori. Pa to, ndoshta do të ishte kthyer në Afrikën e Jugut shumë kohë më parë,” tha Trump.