Donald Trump deklaroi se është afër vendimit për të nisur “një sulm masiv” kundër Iranit, në një shkallë më të madhe se sulmet e deritanishme gjatë konfliktit disamujor me Teheranin. Duke folur për faqen e lajmeve “Axios”, presidenti amerikan tha: “Jam afër marrjes së një vendimi. Jemi të gjithë gati për të”, u shpreh ai. Trump i bëri komentet e tij të enjten, ndërsa çmimi i naftës kaloi përsëri shifrën simbolike prej 100 dollarësh për një fuçi të naftës së papërpunuar Brent, që është edhe standardi ndërkombëtar, dhe mes indikacioneve se çmimi mund të rritet edhe më shumë. Presidenti i SHBA pranoi se një vendim i tillë do të kishte pasoja, por tha se ende nuk kishte marrë një vendim përfundimtar. Izraeli "do të bashkohej brenda dy minutash nëse do t'i kërkoja, por ne nuk kemi nevojë për askënd", shtoi ai, Komentet e Trump pasuan kërcënimin e mëparshëm për “ndëshkim të madh ushtarak” kundër Iranit dhe grupit Huthi, pas sulmeve të milicisë jemenase të mbështetur nga Irani ndaj dy anijeve të naftës të Arabisë Saudite në Detin e Kuq.