Kanadaja do të ishte “shumë më mirë” si shteti i 51-të i SHBA-së, deklaroi sërish presidenti amerikan Donald Trump. Ai ka përsëritur disa herë dëshirën që Kanadaja t’i bashkohet Amerikës. Në një intervistë për Fox News, republikani tha se SHBA humbet 200 miliardë dollarë në vit në subvencione për Kanadanë, teksa theksoi se “nuk do ta lejojë këtë gjë që të ndodhë”. “Është shifër e lartë. Pse po paguajmë 200 miliardë dollarë në vit si subvencion për Kanadanë? Nëse bëhet shteti i 51-të, nuk e kam problem ta bëj”, theksoi Trump. Gjatë intervistës, republikani mbrojti miliarderin Elon Musk, pronarin e platformës sociale X, të cilin e emëroi si kreun e tij të Departamentit të ri të Efikasitetit të Qeverisë (DOGE). Musk është duke udhëhequr përpjekjet e Trump për të ulur kostot dhe burokracinë në qeveri dhe ai po bën një punë “të mirë”, sipas Trump.