Pas kritikave të forta në distancë, presidenti i Shteteve të Bashkuara të Amerikës, Donald Trump, nuk i kurseu sulmet ndaj vendeve anëtare të NATO-s edhe përballë, teksa kërcënoi sërish me tërheqjen e trupave amerikane nga Evropa. Vetëm pak orë pasi mbërriti në Ankara për Samitin e NATO-s, ku u prit nga presidenti turk Erdogan, kreu i Shtëpisë së Bardhë qortoi ashpër vendet e aleancës, që qëndruan jashtë konfliktit të SHBA dhe Izraelit me Iranin. Nga Franca, te Gjermania dhe Italia, të gjitha shtetet e fuqishme evropiane u sulmuan nga Presidenti Trump, i cili tha se është “shumë i zhgënjyer” me to. “Nuk u trajtuam mirë. Ne kemi investuar triliona dollarë në NATO për të mbrojtur vendet evropiane dhe të tjerët. Po testoja njerëz, po testoja për të parë nëse do të ishin aty apo jo. Italia na refuzoi, Gjermania na refuzoi, dhe Franca na refuzoi, dhe është në rregull, por e dini, pse po shpenzojmë qindra miliarda dollarë, dhe ata nuk janë aty për ne? Ne gjithmonë kemi qenë aty për ta". Gjatë takimit me homologun turk, të cilin e quajti “mik dhe udhëheqës shumë të fortë”, presidenti Trump tha se, nëse Samiti i NATO-s nuk do të mbahej në Turqi, nuk do të kishte marrë pjesë. Në mesazhin e tij të ashpër ndaj vendeve të aleancës euroatlantike, presidenti amerikan veçoi kryeministrin në largim të Mbretërisë së Bashkuar, Keir Starmer, dhe kryeministren e Italisë, Giorgia Meloni. Vendimin e Starmer për të lejuar me vonesë forcat amerikane të përdornin bazat ajrore të Britanisë për sulmet ndaj Iranit e quajti “një gjë shumë jopopullore”. Ndërsa për Melonin mesazhi ishte më i ashpër.