Numri i viktimave nga sulmi masiv i kryer nga forcat ruse në Kiev, arriti në 12 të vdekur. Sulmi, që ndodhi gjatë natës, tronditi edhe një herë zemrën e Ukrainës, duke sjellë pasoja të rënda për civilët. Presidenti ukrainas Volodymyr Zelensky akuzoi Moskën për përdorimin e një rakete balistike të prodhuar në Korenë e Veriut gjatë këtij sulmi. Ai e quajti këtë një provë të re të përfshirjes së aktorëve të jashtëm në agresionin rus dhe një rritje të rrezikut që përballet Ukraina dhe siguria globale. Ndërkohë, nga Shtëpia e Bardhë në Uashington, presidenti amerikan Donald Trump reagoi për herë të dytë të enjten pas thirrjes ndaj Putinit për të ndalur sulmet. Trump deklaroi nga zyra Ovale se po ushtron presion të fortë ndaj Rusisë për të ndalur luftën. “Putini i ofroi të ndalojë luftën dhe pushtimin e të gjithë Ukrainës,” tha Trump. Ai shprehu besimin se një marrëveshje është e mundshme dhe se Rusia, Ukraina dhe Evropa do ta pranojnë atë, duke shtuar se fundi i luftës mund të vijë “së shpejti”. Trump theksoi gjithashtu se ai beson se presidenti rus Vladimir Putin “ende dëshiron paqen në Ukrainë”. Këto komente u bënë gjatë një takimi me kryeministrin norvegjez Jonas Gahr Støre (Junas Gahr Tërë), ku diskutimet për paqen dhe sigurinë në Evropë ishin në qendër të vëmendjes.