Presidenti amerikan, Donald Trump, priti në Shtëpinë e Bardhë të martën, kryeministrin e Kanadasë, Mark Carney (Mark Karni). Gjatë takimit në Zyrën Ovale, në takimin e tyre të parë zyrtar, Trumpi ka thënë se ka shumë respekt për kanadezët, duke shtuar se anëtarët e familjes së nënës së tij jetonin atje. "Kanadaja është një vend shumë i veçantë”, ka deklaruar Trump. I pyetur nga gazetarët e pranishëm, ai ka shtuar se i qëndron komenteve të tij për ta bërë Kanadanë shtetin e 51-të të SHBA-së. Në përgjigje të pyetjes së një gazetari, presidenti amerikan ka thënë gjithashtu se shtetësia do të nënkuptonte ushtri të lirë dhe një ulje masive të taksave për kanadezët. Si kundërpërgjigje, Carney ka thënë se disa vende nuk janë kurrë në shitje. "Siç e dini edhe ju zoti president, disa vende nuk janë kurrë në shitje”, ia ka kthyer Carney. Ndërkaq, Trumpi ka replikuar duke i kërkuar Carneyt që “kurrë të mos thotë kurrë”. "Do të shohim me kalimin e kohës se çfarë do të ndodhë”, ka deklaruar shefi i shtëpisë së bardhë.