Presidenti amerikan Donald Trump paralajmëroi një reduktim edhe më të madh të trupave amerikane në Gjermani, përtej tërheqjes së rreth 5 mijë ushtarëve të njoftuar nga Pentagoni. “Do t’i ulim ndjeshëm dhe shumë më tepër se 5 mijë”, deklaroi Trump nga Florida, duke konfirmuar një ndryshim të rëndësishëm në praninë ushtarake amerikane në Evropë. Sipas Departamentit të Mbrojtjes, tërheqja pritet të realizohet brenda 6 deri në 12 muajve. Vendimi përfshin edhe anulimin e një plani të mëparshëm për vendosjen e një batalioni me raketa me rreze të gjatë “Tomahawk” në territorin gjerman. Aktualisht, në Gjermani ndodhen rreth 40 mijë trupa amerikane, ndërsa vendi mbetet një nga nyjet kryesore të operacioneve të SHBA-së në Evropë, përfshirë bazën ajrore strategjike të Ramshteinit. Lëvizja e administratës amerikane ka shkaktuar reagime të forta në Uashington. Edhe ligjvënës republikanë kanë paralajmëruar se ky vendim mund të “dërgojë sinjalin e gabuar” ndaj Vladimir Putin dhe të dobësojë efektin parandalues të NATO-s. Në Gjermani, ministri i Mbrojtjes deklaroi se tërheqja ishte e pritshme dhe theksoi se Evropa duhet të marrë më shumë përgjegjësi për sigurinë e saj. Ai shtoi se Berlini po punon për forcimin e ushtrisë dhe rritjen e kapaciteteve mbrojtëse. Prania ushtarake amerikane në Gjermani daton që nga periudha pas Luftës së Dytë Botërore dhe ka qenë një element kyç i arkitekturës së sigurisë transatlantike. Megjithatë, vendimi i fundit i Uashingtonit sinjalizon një rishikim të rolit të SHBA-së në mbrojtjen e Evropës, në një kohë tensionesh të larta ndërkombëtare.