“Brenda një viti kemi arritur më shumë se çdo administratë tjetër.” Me këto fjalë e nisi , presidenti amerikan Donald Trump nisi konferencën për bilancin e vitit të parë të mandatit të tij të dytë në Shtëpinë e Bardhë. Ai u duk i përmbajtur dhe larg energjisë së zakonshme. Me një ritëm të ngadaltë dhe pauza të shpeshta, presidenti tronditi disi të pranishmit duke nxjerrë një seri fotosh të personave që ai i quajti “kriminelë aktivë” në Minesota, duke theksuar se të gjithë ishin arrestuar nga agjentët për emigracionin. Në një fjalim të ndërthurur mes imazheve të arrestimeve dhe temave ndërkombëtare, presidenti përmendi Venezuelën dhe të ardhmen pas Maduros, duke përmendur edhe emrin e María Corina Machados, por pa dhënë një qëndrim të qartë. “Tani po, e dua Venezuelën. Dhe ata kanë punuar kaq mirë me ne. Ka qenë kaq bukur këto javë. Dhe Machado është një grua jashtëzakonisht e sjellshme që bëri një gjë shumë të pabesueshme duke më dhuruar Nobelin”. Nuk munguan as sulmet politike dhe deklaratat e forta. Trump foli për udhëtimin e tij drejt Zvicrës dhe pjesëmarrjen në Forumin Ekonomik Botëror në Davos, ku politikat e tij të jashtme dhe kërcënimet për Groenlandën kanë nxitur debat të ashpër me europianët. I pyetur se sa larg është gati të shkojë në këto pretendime, presidenti u përgjigj shkurt: “Do ta zbuloni vetë se deri ku mund të mbërrij unë.” Ndërsa më herët ai kishte bërë një postim në “truth social” duke thënë se “Nëse nuk do të kisha ardhur unë, nuk do të kishte NATO tani! Do të kishte qenë në hirin e historisë. Trishtuese, por e VËRTETË!”.