Presidenti Donald Trump tha të dielën se bisedimet për zbatimin e një armëpushimi për Gazën do të zgjasin me ditë, ndërsa shefi i tij i politikës së jashtme Marco Rubio paralajmëroi se Izraeli duhet të ndalojë bombardimet që të ndodhë lirimi i pengjeve. Përpara gazetarëve në Shtëpinë e Bardhë, Trump u shpreh optimist kur tha se negociatat janë në udhë të mbarë. Negociatorët nga Izraeli dhe Hamasi kishin planifikuar të zhvillonin bisedime në qytetin turistik egjiptian Sharm El-Sheikh, me Netanyahun që shprehu shpresën se pengjet e mbajtura në Gaza mund të lirohen brenda ditësh. Por sekretari Rubio bëri thirrje për ndalimin e bombardimeve izraelite në Gaza. "Mendoj se izraelitët dhe të gjithë e pranojnë se nuk mund të lirohen pengje në mes të sulmeve, kështu që sulmet do të duhet të ndalen", tha ai për mediat amerikane. Shtytja diplomatike vjen pas përgjigjes pozitive të Hamasit ndaj planit të Trump për t'i dhënë fund luftimeve dhe lirimin e robërve në Gaza në këmbim të palestinezëve të mbajtur në burgjet izraelite.