Shtetet e Bashkuara po deportojnë me shpejtësi qindra emigrantë pa dokumente në ditë dhe po i dërgojnë ata në vendet e tyre të origjinës, duke përmbushur kështu premtimin e fushatës së Presidentit Donald Trump në vitin 2024 për të dëbuar emigrantët që kanë hyrë në mënyrë të paligjshme në Shtetet e Bashkuara. Të dhënat nga Agjencia Amerikane e Emigracionit dhe Doganave dhe nga Shtëpia e Bardhë, tregojnë se vetëm gjatë ditëve të para të administratës së re Trump, u arrestuan më shumë se 1000 emigrantë dhe qindra u riatdhesuan në vende të tjera, përfshirë Guatemalën. “Po shkon shumë mirë. Ne po largojmë kriminelët e këqij dhe të ashpër”, deklaroi Trump të premten. Ndërkohë, duket se kërcënimet e tij kundër Kolumbisë, kanë funksionuar. Presidenti kolumbian Gustavo Petro, fillimisht refuzoi dy avionë ushtarakë amerikanë dhe tha se ai do të pranonte emigrantë vetëm kur Shtetet e Bashkuara t'i trajtonin me dinjitet, duke përfshirë përdorimin e avionëve civilë për dëbimet. Por në momentin që u njoftua se SHBA do të vendoste një sërë masash ndaj Kolumbisë, kjo e fundit u tërhoq e tanimë, të dy vendet thuhet të kenë arritur një marrëveshje për fluturimet amerikane që do të dërgojnë emigrantët kolumbianë në shtëpi. Në një deklaratë të Shtëpisë së Bardhë sqarohet se është arritur dakordësia që shteti kolumbian të pranojë emigrantët pa asnjë kufizim, përfshirë kthimin e tyre me avionët ushtarakë amerikanë.