Presidenti amerikan Donald Trump urdhëroi vendosjen e trupave në Portland, në Oregon, duke autorizuar përdorimin e "forcës së plotë" nëse është e nevojshme. Trump tha se po "udhëzon Sekretarin e Luftës, Pete Hegseth, të sigurojë të gjitha trupat e nevojshme për të mbrojtur Portlandin e shkatërruar nga lufta". Ai shprehet se ky veprim do të ndihmonte në mbrojtjen e "objekteve tona të qendrave të emigracionit nën rrethim nga sulmi i organizatës Antifa dhe terroristëve të tjerë vendas". Njoftimi solli reagimet e ligjvënësve demokratë, të cilët thanë se nuk kishte nevojë që trupat federale të vendoseshin në qytet. "Nuk ka kërcënim për sigurinë kombëtare në Portland. Komunitetet tona janë të sigurta dhe të qeta", tha guvernatorja e Oregonit, Tina Kotek, në një deklaratë, duke shtuar se i ka kërkuar administratës Trump informacion të mëtejshëm. Kryebashkiaku i Portlandit, Keith Wilson, tha në një deklaratë se "nuk ka nevojë për trupa si këtu dhe në çdo qytet tjetër amerikan". Njoftimi i së shtunës shënon zgjerimin e mëtejshëm të vendosjes së trupave në qytetet amerikane, mes një goditjeje më të gjerë nga administrata Trump kundër imigracionit të paligjshëm. Postimi i Trump nuk specifikon nëse ai synon të aktivizojë gardën kombëtare apo ushtrinë e rregullt amerikane. Postimi gjithashtu nuk specifikoi se çfarë nënkuptohet me përdorimin e "forcës së plotë". Objekti i Imigracionit dhe Doganave (ICE) në Portland është shënjestruar nga protestuesit që nga fillimi i qershorit, duke çuar edhe në përleshje të dhunshme.