Presidenti i sapozgjedhur, Donald Trump ka emëruar vjehrrin e vajzës së tij Tiffany, Massad Boulos (Bulos), si këshilltar për çështjet arabe dhe të Lindjes së Mesme. Biznesmeni libanezo-amerikan është krushku i dytë që i ofrohet një pozicion në administratën e ardhshme, pasi Trump zgjodhi Charles Kushner, vjehrrin e vajzës së tij Ivanka, për të shërbyer si ambasador në Francë. Boulos luajti një rol kyç jozyrtar në fushatën e Trumpit, duke e ndihmuar atë të përballet me votuesit arabo-amerikanë dhe myslimanë, pasi shumë prej tyre u zhgënjyen me administratën Biden për luftën Izrael-Gaza. Duke njoftuar emërimin në mediat sociale, Trumpi ka thënë se Boulos ishte "instrumental në ndërtimin e koalicioneve të reja të jashtëzakonshme me komunitetin arabo-amerikan". “Ai ka qenë një përkrahës i vlerave republikane dhe konservatore”, ka thënë Trump në “Truth Social”, duke shtuar se Boulos ishte një “aset” për fushatën e tij. Boulos u bëri thirrje gjatë fushatës votuesve arabo-amerikanë dhe myslimanë që ta votonin Trumpin duke u premtuar atyre se do të rivendoste paqen në Lindjen e Mesme. Ai ka shërbyer si një lidhje jozyrtare midis Trumpit dhe liderëve të Lindjes së Mesme.