Në përpjekje për t’i dhënë fund luftës në Ukrainë, Presidenti Amerikan Donald Trump thotë sedo të kërkojë ndihmën e Kinës. Ai e sheh aleaten e njohur të Rusisë si një mundësi të mirë për të bindur Vladimir Putin që t’i japë fund agresionit të paprovokuar në Ukrainë. “Do të doja që Kina të na ndihmonte me Rusinë”, tha presidenti amerikan në bordin e Air Force One, ndërsa nisej për një turne në Azi ku do të takohet me presidentin e Kinës, Xi Jinping. Përfundimi i luftës Rusi-Ukrainë është bërë një pikë qendrore për Trumpin në muajt e fundit, me një marrëveshje armëpushimi që deri më tani ka mbetur në letër, pavarësisht premtimeve të tij të fushatës për ta zgjidhur situatën shpejt. Takimi mes trump dhe Xi Trump në Korenë e Jugut vjen si një përpjekje për të nënshkruar një marrëveshje për t'i dhënë fund luftës tregtare midis dy ekonomive më të mëdha në botë. Trump do të vizitojë gjithashtu Malajzinë dhe Japoninë në udhëtimin e tij të parë në Azi që kur u kthye në Shtëpinë e Bardhë në janar. Gjatë turit të tij Trump nuk e përjashtoi mundësinë e një takimi edhe me udhëheqësin e Koresë së Veriut, Kim Jong Un. I pyetur nëse ishte i hapur ndaj kërkesës së Koresë së Veriut për t’u njohur si shtet bërthamor si parakusht për bisedime, Trump u përgjigj: “Epo, mendoj se ata janë një lloj fuqie bërthamore... Ata kanë shumë armë bërthamore, më duhet ta them këtë.” Të dy udhëheqësit u takuan për herë të fundit në Zonën e Demilitarizuar që ndan dy Koretë gjatë mandatit të parë të Trump. Kim ka thënë se do të ishte gjithashtu i hapur për t'u takuar me presidentin e SHBA-së nëse Uashingtoni heq dorë nga kërkesa e tij që Pheniani të heqë dorë nga arsenali i tij bërthamor.