Presidenti i Shteteve të Bashkuara, Donald Trump, ka rindezur përplasjen me Europën për tarifat doganore. Në një postim në rrjetin e tij Truth Social, ai paralajmëroi rritjen e tarifës në 25% për makinat nga Bashkimi Evropian, pasi sipas tij, unioni nuk po respekton marrëveshjen tregtare. “Bazuar në faktin se Bashkimi Evropian nuk po i përmbahet Marrëveshjes sonë të Tregtisë, për të cilën jemi plotësisht të dakordësuar, javën tjetër do të rris tarifat e ngarkuara ndaj Bashkimit Evropian për makinat dhe kamionët që hyjnë në Shtetet e Bashkuara. Tarifa do të rritet në 25%. Nëse prodhojnë automjete dhe kamionë në fabrika brenda SHBA-së, nuk do të ketë asnjë tarifë”. Nga ana tjetër, Bernd Lange, kreu i Komisionit të Tregtisë në Parlamentin Evropian, mohoi që Evropa të ketë shkelur marrëveshjet dhe akuzoi administratën amerikane për mungesë besueshmërie. “Sjellja e Trump është e papranueshme. Parlamenti ishte gati të ratifikonte legjislacionin për marrëveshjen tregtare me SHBA-në. Janë Shtetet e Bashkuara që kanë shkelur vazhdimisht marrëveshjet, dhe kjo nuk është mënyra për të trajtuar aleatët. Tani mund të përgjigjemi vetëm me qartësi dhe vendosmëri”. Lëvizja e SHBA-së vjen në një moment tensioni të lartë në ekonominë globale dhe atë evropiane, lidhur edhe me pasojat e luftës së SHBA dhe Izraeli kundër Iranit, përfshirë bllokimin e Ngushticës së Hormuzit, një nga rrugët kryesore të transportit të naftës në botë. Trump dhe presidentja e Komisionit Evropian, Ursula von der Leyen, kishin arritur një marrëveshje tregtare korrikun e kaluar, sipas së cilës shumica e mallrave evropiane që importohen në SHBA i nënshtrohen një tarife bazë prej 15%. Gjykata Supreme në SHBA vendosi se presidenti amerikan nuk kishte autoritet ligjor për të shpallur emergjencë ekonomike dhe për të vendosur tarifa ndaj mallrave evropiane. Vendimi i Gjykatës Supreme e uli tarifën bazë në 10%.