Donald Trump njoftoi se po pezullon përkohësisht përpjekjen amerikane për të shoqëruar anijet në Ngushticën e Hormuzit, edhe pse e bëri të qartë se bllokada ndaj porteve iraniane do të vazhdojë. Presidenti i SHBA-së u shpreh se e pezullon përkohësisht operacionin “Projekti Liria” për t’i dhënë kohë arritjes së një marrëveshjeje me Iranin lidhur me përfundimin e konfliktit. Ai e justifikoi vendimin me kërkesat e disa vendeve, përfshirë Pakistanin, dhe me progresin drejt një marrëveshjeje përfundimtare, ndërsa Irani vetë nuk ka reaguar ende. Sekretari amerikan i Shtetit, Marco Rubio, deklaroi se operacioni kryesor ushtarak i SHBA-së kundër Iranit ka përfunduar dhe armëpushimi vazhdon, por theksoi se paqja kërkon që Irani të pranojë kushtet amerikane për programin bërthamor dhe të rihapë ngushticën e Hormuzit. Mbyllja efektive e kalimit të rëndësishëm ujor nga regjimi i ajatollahëve- një rrugë kyce kjo për transportin e naftës, gazit dhe produkteve të tjera energjetike-ka shkaktuar rritje të fortë të çmimeve të karburantit dhe ka tronditur ekonominë globale. Hapja e saj shihet si thelbësore për të ulur presionin ekonomik dhe për të dobësuar ndikimin e Iranit. Deri tani, vetëm dy anije tregtare dihet se kanë kaluar përmes korridorit të mbrojtur nga SHBA, ndërsa qindra të tjera, me deri në 23 mijë anëtarë ekuipazhi, mbeten të bllokuara në Gjirin e Hormuzit. Ndërkohë, tensionet ushtarake vazhdojnë në nivel të ulët. SHBA thotë se veprimet e saj janë mbrojtëse dhe se nuk do të qëllojë e para, ndërsa Irani akuzohet për sulme me dronë dhe raketa ndaj Emirateve të Bashkuara Arabe, akuza këto të cilat Teherani i mohon.