Presidenti i Shteteve të Bashkuara të Amerikës, Donald Trump, ka kundërshtuar hapur planet për aneksimin e Bregut Perëndimor, të cilat po diskutohen në parlamentin izraelit. Ai deklaroi se Izraeli “nuk do të bëjë asgjë në Bregun Perëndimor” dhe paralajmëroi se çdo veprim në këtë drejtim do të sillte pasoja të rënda në marrëdhëniet me Uashingtonin. Knesseti ka votuar për të nisur debatet mbi dy projektligje që synojnë zgjerimin e sovranitetit izraelit në këtë territor banuar nga palestineze. “Mos u shqetësoni për Bregun Perëndimor. Izraeli nuk do të bëjë asgjë atje,” tha Trump gjatë një deklarate për gazetarët në Shtëpinë e Bardhë. Në një intervistë për revistën Time, presidenti amerikan theksoi se kishte dhënë fjalën e tij vendeve arabe gjatë negociatave për armëpushimin në Rripin e Gazës. “Kjo nuk do të ndodhë, sepse u dhashë fjalën vendeve arabe. Nëse Izraeli tenton ta bëjë këtë, do të humbasë mbështetjen e SHBA-së,” nënvizoi Trump. Pavarësisht kundërshtimit nga kryeministri izraelit Benjamin Netanyahu dhe partia e tij Likud, ligjvënësit në Knessetin votuan për avancimin e legjislacionit të shumëdiskutuar. Votimi, u mbajt gjatë një vizite të zëvendëspresidentit të SHBA-së, JD Vance në Izrael për të mbështetur marrëveshjen e armëpushimit në Gaza. Në një deklaratë të saj Likud e cilësoi votimin një “tjetër provokim nga opozita që synonte dëmtimin e marrëdhënieve tona me Shtetet e Bashkuara". Aneksimi i Bregut Perëndimor do të fundoste përfundimisht cdo shpresë për një zgjidhje me dy shtete të konfliktit të hershëm palestinezo-izraelit.