Në një intervistë të gjate për emisionin “Meet the Press” të NBC-së, Presidenti Donald Trump foli për pasardhës të mundshëm, por diskutoi edhe marrjen e Groenlandës me forcë ushtarake. Kur u pyet nëse po merr në kondsideratë përdorimin e forcës ushtarake për të marrë Groenlandën , Trump tha se nuk e përjashtonte mundësinë, duke këmbëngulur se ishulli i pasur me burime i duhet edhe për qëllime të sigurisë kombëtare. “Nuk them se do ta bëj, por nuk përjashtoj asgjë”, tha Trump. “Ne kemi shumë nevojë për Groenlandën”, vazhdoi ai. “Groenlanda ka një numër shumë të vogël njerëzish, për të cilët do të kujdesemi dhe do t'i vlerësojmë ata. Por ne kemi nevojë për këtë ishull për sigurinë tonë kombëtare, shtoi Presidenti. Sa për të bërë Kanadanë shtetin e 51 amerikan, Presideneti tha se ishte "e pamundur" që ai të përdorte forcën ushtarake. Trump mohoi sakaq se po shqyrtonte mundësinë e kandidimit për një mandat të tretë presidencial, një veprim për të cilin ekspertët bien dakord se është i ndaluar sipas Kushtetutës amerikane. “Ka shumë njerëz që po e shesin kapelen e vitit 2028. Por kjo nuk është diçka që dua ta bëj. Dua të kem katër vite të shkëlqyera dhe pastaj t’ia lë dikujt tjetër, idealisht një republikani të shkëlqyer. Mendoj se katër vjet janë kohë e mjaftueshme për të bërë diçka vërtet spektakolare”, shtoi ai.