Presidenti amerikan Donald Trump ka njoftuar se Shtetet e Bashkuara do të rivendosin “menjëherë” bllokadën e porteve iraniane në Ngushticën e Hormuzit. Në një postim në Truth Social, ai deklaroi se SHBA-ja do të marrë rolin e garantueses së sigurisë në këtë rrugë strategjike detare dhe se do të vendosë një tarifë prej 20% për të gjitha ngarkesat që kalojnë nëpër ngushticë, për të mbuluar kostot e sigurisë dhe mbrojtjes. Mbetet ende e paqartë se si do të zbatohet kjo masë. Deklarata vjen pasi ushtria iraniane paralajmëroi se nuk do të lejojë ndërhyrjen e SHBA-së në menaxhimin e Ngushticës së Hormuzit. Ndërkohë, përplasjet mes dy vendeve vazhdojnë. Komanda Qendrore e SHBA-së (CENTCOM) njoftoi se ka përfunduar raundin e fundit të sulmeve ndaj objektivave iraniane, si përgjigje ndaj sulmeve të Iranit ndaj anijeve tregtare në ngushticë. Sipas të dhënave të MarineTraffic, një numër i kufizuar anijesh po lëvizin aktualisht nëpër Ngushticën e Hormuzit, ndërsa trafiku detar mbetet i reduktuar. Nga ana tjetër, Irani ka deklaruar se po godet baza ushtarake amerikane në Jordani, Bahrein dhe Kuvajt, si dhe sisteme radarësh në Oman. Bahreini ka akuzuar Iranin se po vë në shënjestër edhe civilët.