Premtimi i Presidentit të zgjedhur Donald Trump se do të realizojë deportimin më masiv në historinë e Shteteve të Bashkuara ngre pikëpyetje mbi ligjshmërinë dhe zbatimin e këtij procesi. Ushtria amerikane mund të përfshihet në këto plane. Gjatë fushatës së tij presidenciale, Donald Trump tha se problemi më i rëndë i Amerikës është emigracioni i paligjshëm. “Do të kryejmë deportimin më të madh në histori. Nuk jam krenar ta them këtë, por është diçka e vështirë që duhet bërë”, wshtw shprehur gjatw fushatws Trump. Pasi fitoi zgjedhjet e 5 nëntorit, Trump shpërndau një postim në mediat sociale duke thënë se do të shpallte një emergjencë kombëtare dhe do të dislokonte trupa amerikane për të ndihmuar në kryerjen e deportimeve. Komisioni i Ligjeve në Senatit diskutoi këtë javë sfidat e dëbimeve masive. Demokratët thanë se një gjë e tillë mund të dëmtojë ekonominë. “Është fakt që sot gjenden miliona emigrantë pa dokumente në Shtetet e Bashkuara, që punojnë në industri kritike për të gjithë ekonominë tonë”, shprehet një senator demokrat. Ligjet federale kufizojnë përfshirjen e ushtrisë në zbatimin e ligjit civil pa miratimin e Kongresit, por kompetencat jourgjente do ta lejonin presidentin të dislokonte forcat ushtarake për të ofruar mbështetje logjistike. Disa ekspertë thonë se ushtarëve u mungon trajnimi për zbatimin e ligjeve mbi emigracionin. Shteti i Teksasit po i ofron administratës së ardhshme Trump më shumë se 550 hektarë tokë për të ndërtuar një objekt paraburgimi dhe përpunimi, për atë që komisioneri shtetëror i tokës thotë se do të jetë, “deportimi më i madh të kriminelëve të dhunshëm në historinë e kombit tonë”.