Presidenti i zgjedhur amerikan, Donald Trump, njoftoi se ka arritur me Meksikën një marrëveshje që do të frenonte emigracionin e paligjshëm. “Folëm edhe për rrugët që mund të ndiqen për të frenuar fluksin e narkotikëve drejt Shteteve të Bashkuara. Ishte një bisedë mjaft konstruktive”, shpjeoi republikani në platformën e tij, Truth Social, duke nënvizuar se “Meksika do të ndalojë menjëherë këdo që tenton të kalojë kufirin, e kjo sipas tij, do të kontribuojë ndjeshëm në ndalimin e atij që e përshkruan si “pushtim i klandestinëve”. Ka qenë e menjëhershme përgjigja e presidentes meksikane, Claudia Sheinbaum Pardo, e cila deklaroi se nuk ka asnjë plan për mbylljen e kufirit me Shtetet e Bashkuara. "Në bisedën me Trump shpjegova strategjinë e Meksikës për të trajtuar fenomenin e emigracionit duke respektuar të drejtat e njeriut. Ne ritheksojmë se qëndrimi i Meksikës nuk është të mbyllë kufijtë, por të ndërtojë një urë mes qeverive dhe popujve," deklaroi Sheinbaum. Dy udhëheqësit biseduan disa ditë pasi Trump kërcënoi se do të vendoste tarifa të reja ndaj Kanadasë dhe Meksikës si pjesë e përpjekjeve të tij për të frenuar emigrimin ilegal dhe trafikimin e drogës. Emigrimi i paligjshëm përgjatë kufirit me Meksikën ka rënë pjesërisht për shkak se administrata e presidentit amerikan, Joe Biden, ka bashkëpunuar me Meksikën për përforcimin e sigurisë.Arritjet në kufirin SHBA-Meksikë kanë rënë për 40 për qind, nga niveli rekord që u shënua dhjetorin e kaluar. Zyrtarët amerikanë kanë vlerësuar se kjo ka ndodhur për shkak të kontrolleve të shtuara në anën meksikane.Të shtyrë nga presioni në rritje nga SHBA-ja për të bllokuar emigrantët që nisen drejt veriut, në vitet e fundit autoritetet meksikane i kanë grumbulluar emigrantët nga mbarë vendi dhe po i kanë dërguar në jug të Meksikës, një strategji që disa ekspertë e kanë parë si përpjekje për të dekurajuar emigrantët, në mënyrë që ata të mos tentojnë të kalojnë për në SHBA.