Shtëpia e Bardhë e ka kritikuar Amazonin duke thënë se është “armiqësor” dhe “politik”, gjatë një konference për shtyp të martën për të shënuar 100-ditorin e administratës së dytë të Donald Trumpit. Deklarata pason raportet që sugjerojnë se shitësi me pakicë në internet, së shpejti do t’u tregojë konsumatorëve se sa po i kushtojnë tarifat e Trumpit kostos së produkteve të tij, raporton BBC. "Ky është një akt armiqësor dhe politik nga Amazon", ka deklaruar sekretarja e Shtypit, Karoline Leavitt. Tarifat dhe taksat e rritura për mallrat e blera nga vende të tjera, kanë qenë një çështje e nxehtë e administratës së Trumpit, pas vendimit të tij për të vendosur tarifa 145% për mallrat kineze dhe 10% për mallrat nga shumica e vendeve të tjera. Që nga rikthimi në detyrë tre muaj më parë, Trumpi ka reformuar qeverinë amerikane me shumë veprime ekzekutive. Kritikët thonë se presidenti po i kapërcen kompetencat e tij, ndërkohë që kështu po largon edhe aleatët ndërkombëtarë. Por për mbështetësit e Trumpit, presidenti po përmbush premtimet e tij zgjedhore.