Presidenti i SHBA-së, Donald Trump, pas incidenteve në Los Angeles, iu përgjigj pyetjeve të gazetarëve në lidhje me përleshjet dhe trazirat e shkaktuara së fundmi. “Do të kemi trupa kudo”, tha ai kur u pyet nëse planifikonte të dërgonte trupa në Los Angeles. “Nuk do ta lejojmë që kjo të ndodhë në vendin tonë… Nëse shohim një rrezik për vendin dhe qytetarët tanë, do të jemi shumë të ashpër.” “Ne do të dërgojmë gjithçka që duhet për të siguruar që të ruhet ligji dhe rendi”, shtoi ai, sipas BBC-së. “Mbrëmë në Los Angeles i pamë ngjarjet nga afër, pati shumë dhunë dhe mund të kishte qenë shumë më keq”, tha presidenti i SHBA-së. Trump u tha gjithashtu gazetarëve se zyrtarët e Kalifornisë mund të përballen me akuza federale për pengimin e përpjekjeve të deportimit, duke konfirmuar një ide të hedhur fillimisht nga Shefi i Patrullës Kufitare. “Zyrtarët që pengojnë ruajtjen e rendit dhe ligjit, po, do të dalin para gjyqtarëve”, deklaroi ai. Kur u pyet nëse mendonte se protestat do të përhapeshin, Trump u përgjigj: “Do ta ndjekim situatën me shumë kujdes”.