Sapo të përfundojnë operacionet ushtarake në Iran, do të marr kontrollin e Kubës, deklaroi presidenti i Shteteve të Bashkuara, Donald Trump, gjatë një eventi në Florida, ku edhe një herë paralajmëroi se Republika Islamike nuk duhet lejuar kurrsesi të zotërojë armë bërthamore. Nuk mund të ketë Irani armë bërthamore, sepse do ta përdorte shumë shpejt kundër Izraelit, do t`i përdorte në Lindjen e Mesme e në Europë, dhe të radhës, paskësaj, do të ishim ne. Kjo nuk ka për të ndodhur. Në Uashington, deklaratat e presidentit kanë shkaktuar reagime të forta nga demokratët, të cilët e akuzojnë se ka hyrë në konflikt pa autorizimin e Kongresit dhe e cilësuan luftën me Iranin “si të paligjshme”. “Deklaratat e tij nuk pasqyrojnë realitetin për mijëra ushtarë në rajon. Trump ka hyrë në këtë luftë pa strategji dhe pa një autorizim ligjor duke shmangur Kongresin”, u shpreh senatorja demokrate Jeanne Shaheen. Reagimi i shefit të Shtsëpisë së Bardhë ndaj kritikave ishte se të thuash që Shtetet e Bashkuara nuk po fitojnë në Iran është, sipas tij, një akt tradhtie. Trump ka njoftuar Kongresin se armiqësitë me Iranin kanë përfunduar, duke theksuar megjithatë se Teherani mbetet një kërcënim i rëndësishëm. Shtëpia e Bardhë argumenton se armëpushimi shmang nevojën për një autorizim të ri për përdorimin e forcës. Mes tensioneve në Washington sakaq, nga CBS news mbërrin lajmi se Pentagoni po planifikon të tërheqë rreth 5 mijë ushtarë nga Gjermania brenda muajve të ardhshëm. Lëvizja shihet si një sinjal i pakënaqësisë së administratës amerikane ndaj mbështetjes së aleatëve europianë.