Presidenti amerikan, Donald Trump ka përsëritur qëndrimin se nëse ai do të ishte në detyrë tre vite më parë, nuk do të kishte lejuar të niste lufta në Ukrainë, por këtë herë ai fajësoi presidentin ukrainas Volodymyr Zelensky. Në një postim të ndarë këtë të hënë, ai shkroi ndër të tjera, se Zelensky dhe “Biden” bënë “një punë të tmerrshme duke lejuar fillimin e kësaj tragjedie”, pavarësisht faktit se kishte shumë mënyra për ta parandaluar atë që të ndodhte. “Lufta midis Rusisë dhe Ukrainës është lufta e Bidenit, jo e imja. Unë sapo erdha në pushtet dhe për katër vjet gjatë mandatit tim, nuk e kisha problem ta pengoja të ndodhte. Presidenti Putin dhe të gjithë të tjerët, e respektuan presidentin tuaj! Nuk kam TË BËJ ME KËTË LUFTË, POR KAM PUNUAR ME ZELL PËR TË NDALUAR. Nëse zgjedhjet presidenciale në 2020 nuk do ishin manipuluar, kjo luftë e tmerrshme nuk do të kishte ndodhur kurrë”-tha ai. Dje, Trump e përshkroi sulmin rus me raketa që vrau të paktën 34 njerëz dhe plagosi 117 të tjerë në Sumy si “të tmerrshëm”, por nuk fajësoi në mënyrë të drejtpërdrejtë Rusinë. “Mendoj se është e tmerrshme. Më kanë thënë se kanë bërë një gabim. Por mendoj se është një gjë e tmerrshme”, u tha presidenti gazetarëve në Air Force One. I pyetur për “gabimin”, Trump tha: “Ata bënë një gabim dhe ju duhet të pyesni ata”, pa sqaruar se kujt i referohej.