Donald Trump ka kërcënuar me burgim të përjetshëm Mark Zuckerberg nëse shefi ekzekutiv i Meta-s tenton të “komplotojë” kundër tij në zgjedhjet e ardhshme presidenciale. Republikani ka deklaruar në mënyrë të përsëritur – se manjati i teknologjisë ndërhyri në zgjedhjet presidenciale të 2020-ës në favor të Joe Biden. Tani, në librin e tij “Save America”, Trump ka shkruar se Zuckerberg do të "kalojë pjesën tjetër të jetës së tij në burg" nëse ai përpiqet të ndikojë sërish më 5 nëntor. “Ne po e vëzhgojmë atë nga afër dhe nëse ai bën ndonjë gjë të paligjshme këtë herë, ai do të kalojë pjesën tjetër të jetës së tij në burg – ashtu si të tjerët që do të marrin guximin dhe do të mashtrojnë në zgjedhjet presidenciale të 2024-ës”, ka shkruar Trump, sipas një fragmenti të publikuar për herë të parë nga Politico. Libri fillimisht do të dalë të martën në treg për një numër të kufizuar blerësish dhe do të kushtojë 99 dollarë, ndërsa klientët që duan një kopje të nënshkruar nga Trump duhet të paguajnë 400 dollarë shtesë.