Një ditë pas betimit, Presidenti i Shteteve të Bashkuara, Donald Trump, i drejtohet me një mesazh të fortë homologut rus, Vladimir Putin. Sipas Trump, Putin po shkatërron Rusinë, duke mos negociuar përfundimin e luftës me Ukrainën. “Presidenti ukrainas Volodymyr Zelenskyy më tha që ai do që të arrijë një marrëveshje. Nuk di nëse Putini e do një gjë të tillë. Ndoshta nuk do, nuk e di. Ai duhet të bëjë një marrëveshje. Mendoj se po shkatërron Rusinë duke mos bërë një marrëveshje. Mendoj se Rusia do të ketë probleme të mëdha. Shikojeni ekonominë, shikojeni inflacionin në Rusi... Unë merresha vesh me të dhe shpresoj që ai do që të bëjë një marrëveshje”, u tha Presidenti Trump gazetarëve të hënën në Zyrën Ovale. Presidenti i rizgjedhur i Shteteve të Bashkuara gjithashtu tha se ai dëshiron ta takojë së shpejti Presidentin rus Putin, por se një datë për takimin nuk është përcaktuar ende. Vetëm disa orë para ceremonisë së inaugurimit të Trump të hënën, Putin i tha Këshillit të Sigurisë së Rusisë ai është i hapur për bisedime me administratën e re amerikane rreth luftës në Ukrainë dhe armëve bërthamore.