Presidenti amerikan, Donald Trump, ka kritikuar ashpër kancelarin gjerman, Friedrich Merz dhe shtetin e tij. Në një postim në Truth Social, Trump ka shkruar se kancelari i Gjermanisë, mendon se është në rregull që Irani të ketë armë bërthamore. Ndërkaq për Gjermaninë ka deklaruar se nuk është e çuditshme që i ka punët, “kaq keq, si në aspektin ekonomik e po ashtu edhe në aspekte të tjera”. “Kancelari i Gjermanisë, Friedrich Merz, mendon se është në rregull që Irani të ketë armë bërthamore. Ai nuk e di për çfarë po flet! Nëse Irani do të kishte armë bërthamore, e gjithë bota do të mbahej peng. Unë po bëj diçka me Iranin tani, që kombet e tjera, ose presidentët, duhet ta kishin bërë shumë kohë më parë. Nuk është çudi që Gjermania po shkon kaq keq, si ekonomikisht, ashtu edhe në aspektet e tjera!” Deklarata e tij vjen si kundërpërgjigje ndaj deklaratës së Merzit të hënën, ku kishte thënë se Irani po poshtëron SHBA-në. Presidenti Trump ka kritikuar ashpër edhe aleatët e NATO-s që nuk kanë dërguar flotat e tyre detare për të ndihmuar në hapjen e Ngushticës së Hormuzit gjatë konfliktit. Kjo rrugë ujore ka mbetur pothuajse e mbyllur, duke shkaktuar tronditje në tregje dhe ndërprerje të paprecedentë në furnizimet me energji.