Pas dështimit të bisedimeve të nivelit të lartë me Kanadanë, Presidenti Donald Trump ka lëshuar akuza të forta ndaj fqinjit verior, duke provokuar sërish me idenë e kthimit të Kanadasë në "shtetin e 51-të" të Amerikës. Dështimi i negociatave ka aktivizuar menjëherë tarifa të rrepta prej 50% nga ana e Uashingtonit për një gamë të gjerë të mallrave kanadeze. Trump e mbrojti këtë vendim duke argumentuar se fermerët amerikanë janë ndëshkuar për vite me radhë nga tarifat e vendosura nga Otava. Kryeministri kanadez, Mark Carney i cilësoi tarifat e Trumpit si një “llogaritje të gabuar strategjike” të projektuar qëllimisht për të dëmtuar dhe përçarë ekonominë kanadeze. “Ata kërkuan shumë dhe ofruan shumë pak,” deklaroi Carney. “Je në luftë kur sulmohesh. Ne u sulmuam. Ne nuk mund ta pranojmë atë që kanë ofruar dhe nuk do të japim atë që kanë kërkuar.” Udhëheqësi kanadez konfirmoi zyrtarisht se vendi i tij do t'u përgjigjet tarifave të Trumpit duke i barazuar ato “dollar për dollar” duke filluar nga data 8 shtator. Paketa e hakmarrjes ekonomike të Kanadasë do të përfshijë taksa të larta mbi çelikun amerikan, produktet e qumështit, pajisjet e ndryshme dhe industrinë e elektronikës. Ekspertët e ekonomisë paralajmërojnë se kjo luftë e hapur tregtare dëmton rëndë zinxhirët e integruar të furnizimit mes dy gjigantëve të Amerikës së Veriut.