“Gërshërës” së Presidentit Donald Trump për shkurtime punonjësish e programesh nuk i shpëton as Departamenti Amerikan i Shtetit. Sekretari i Shtetit, Marco Rubio, njoftoi këtë të martë vendimin për riorganizimin e DASH, që sipas tij, synon të eliminojë zyrat që administrata e Trump i konsideron të tepërta dhe për të shkurtuar disa programe, që siç thekson Rubio, nuk përputhen me interesat e SHBA. “Kjo qasje do të fuqizojë Departamentin që nga themeli, nga zyrat te ambasadat”, tha Rubio në një deklaratë, duke i përshkruar lëvizjet si pjesë e agjendës së Trumpit për ta vendosur SHBA-në në rend të parë, si prioritet. "Funksionet specifike për rajone do të konsolidohen për ta rritur funksionalitetin, zyrat e tepërta do të hiqen dhe programet jo-statutore, që nuk janë në përputhje me interesat thelbësore kombëtare të Amerikës, do të pushojnë së ekzistuari", sqaroi Rubio. Punën që më parë e kryente nënsekretari për Siguri Civile, të Drejtat e Njeriut dhe Demokraci tani do të vendoset nën një koordinator të ri për Ndihmën e Jashtme dhe Çështjet Humanitare, shtoi më tej Rubio. Rubio, i cili shërben edhe si mbikëqyrës i administratës së shkatërruar të USAID-it, kritikoi rritjen e departamentit ndër vite, duke e quajtur atë "të fryrë, burokratik dhe të paaftë për të kryer misionin e tij thelbësor diplomatik në këtë epokë të re të konkurrencës së fuqive të mëdha".