Presidenti amerikan, Donald Trump, zhvilloi të mërkurën një tjetër bisedë telefonike me homologun rus, Vladimir Putin, me në fokus sulmet e fundit me dronë të Ukrainës ndaj rusëve. Në bisedën 15-minutëshe, Trump theksoi se Putin ka shprehur vendosmërinë për t’iu përgjigjur sulmeve ukrainase. “Sapo përfundova një bisedë telefonike me Presidentin Vladimir Putin të Rusisë. Diskutuam mbi sulmin ndaj avionëve rusë të ankoruar, nga ana e Ukrainës, si dhe për disa sulme të tjera që kanë ndodhur nga të dyja palët. Ishte një bisedë e mirë, por jo një bisedë që do të çojë menjëherë drejt Paqes. Presidenti Putin u shpreh se do të duhet të përgjigjet me forcë ndaj sulmit të fundit mbi bazat ajrore”. Gjithashtu, pjesë e bisedës telefonike mes dy liderëve ishte edhe Irani, ku si Trump, ashtu edhe Putin, ishin në një mendje se nuk mund të ketë armë bërthamore. “Diskutuam gjithashtu për Iranin dhe faktin se po mbaron koha për vendimin që Irani duhet të marrë në lidhje me armët bërthamore – një vendim që duhet të merret shpejt! I theksova Presidentit Putin se Irani nuk mund të ketë armë bërthamore dhe, për këtë çështje, besoj se ishim në një mendje”. Kreu i Shtëpisë së Bardhë u shpreh se Irani po e zvarrit qëllimisht vendimmarrjen për këtë çështje shumë të rëndësishme dhe, sipas tij, do duhet një përgjigje përfundimtare brenda një periudhe shumë të shkurtër kohe. Presidenti rus Vladimir Putin zhvilloi të mërkurën telefonatën e parë me Papën Leon XIV. Sipas deklaratës së publikuar nga Kremlini, presidenti rus i tha Papës se “Rusia dëshiron paqen”, por theksoi se “autoritetet e Kievit po kërkojnë përshkallëzimin e mëtejshëm të konfliktit”. Putin ritheksoi “interesin për arritjen e paqes përmes mjeteve politike dhe diplomatike”.