SHBA kanë konfirmuar se kanë nisur kontakte të drejtpërdrejta diplomatike me Iranin, ndërkohë që presidenti Donald Trump paralajmëroi se do të vendosë për një ndërhyrje të mundshme ushtarake brenda dy javësh. Ndërkohë, situata në Lindjen e Mesme vazhdon të përshkallëzohet me ritme alarmante, teksa Irani ka goditur sërish Izraelin me raketa. Një nga raketat iraniane goditi spitalin Sokora në Bersheva, në jug të Izraelit, duke lënë dhjetëra të plagosur. Ushtria izraelite ka akuzuar Teheranin për përdorimin e bombave thërrmuese, një veprim që përbën shkelje të rënda të së drejtës ndërkombëtare. Përballë këtyre zhvillimeve, presidenti Trump deklaroi se SHBA po vlerëson të gjitha opsionet dhe dëshiron të japë përparësi diplomacisë përpara çdo vendimi ushtarak. “Bazuar në faktin se ka një shans të konsiderueshëm për negociata që mund të zhvillohen ose jo me Iranin në të ardhmen e afërt, do të vendos brenda dy javësh,” citohet të ketë thënë Trump, përmes një deklarate të lexuar nga sekretarja për media e Shtëpisë së Bardhë, Karoline Leavitt. Leavitt theksoi gjithashtu se çdo marrëveshje e ardhshme me Iranin duhet të përfshijë ndalimin e pasurimit të uraniumit dhe se qëndrimi i SHBA mbetet i palëkundur: “Irani nuk duhet të ketë armë bërthamore”. Nga ana tjetër, Ministri izraelit i inteligjencës, Israel Katz, ka përsëritur kërcënimin e tij drejtuar liderit suprem iranian, Khamenei, duke thënë: “Ai nuk duhet të ekzistojë”. Analistët paralajmërojnë se përplasja e drejtpërdrejtë mes Iranit dhe Izraelit rrezikon të përhapet në gjithë rajonin. Parlamenti iranian ka kërcënuar me mbylljen e Ngushticës së Hormuzit, një arterie kyçe për eksportet ndërkombëtare të naftës, në rast të ndërhyrjes së SHBA-së.