Presidenti amerikan Donald Trump po planifikon të organizojë një samit trepalësh me presidentin ukrainas Volodymyr Zelensky dhe presidentin rus Vladimir Putin, me shpresën për të gjetur një zgjidhje të shpejtë për konfliktin në Ukrainë, raportoi CNN. Burime nga Shtëpia e Bardhë konfirmojnë se Trump ka kushtëzuar organizimin e këtij samiti me ecurinë e bisedimeve që priten të zhvillohen të hënën në Zyrën Ovale me Zelenskyn. Ndërkohë, Bashkimi Evropian është duke ndjekur nga afër zhvillimet, me pritshmëri që edhe një lider evropian t’i bashkohet takimeve, edhe pse emri i tij ende nuk është konfirmuar. Megjithatë, zyrtarët evropianë kanë shprehur shqetësime serioze mbi mundësinë që presidenti ukrainas të vihet nën presion për të pranuar kushte të papranueshme. Ata druhen se në rast refuzimi të ndonjë propozimi nga pala amerikane, Zelensky mund të poshtërohet publikisht, siç ka ndodhur në të kaluarën.