Presidenti i Shteteve të Bashkuara, Donald Trump, deklaroi se lufta me Iranin është “shumë afër përfundimit”, duke rritur shpresat për një rifillim të shpejtë të negociatave mes Uashingtonit dhe Teheranit. Deklarata u bë gjatë një interviste për Fox News, ndërsa sipas Trump, brenda dy ditëve të ardhshme mund të ketë një tjetër raund bisedimesh në Islamabad. Paralelisht me optimizmin diplomatik, SHBA-ja ka forcuar presionin ushtarak në det, duke ndaluar hyrje-daljet tregtare të Iranit përmes porteve të tij. Nga ana tjetër, Teherani reagoi me tone kërcënuese dhe paralajmëroi se nëse SHBA vijon të krijojë pasiguri për anijet tregtare iraniane, forcat e armatosura të vendit mund të bllokojnë çdo eksport dhe import në Gjirin Persik, Detin e Omanit dhe Detin e Kuq. Një skenar i tillë do të rrezikonte seriozisht tregtinë detare në pothuajse të gjithë Lindjen e Mesme dhe do të kishte pasoja të menjëhershme në tregjet globale të energjisë. Në të njëjtën kohë, Trump ka zbuluar se i ka dërguar një letër presidentit kinez Xi Jinping, duke i kërkuar që Pekini të mos furnizojë Iranin me armë.