Presidenti amerikan Donald Trump përgatitet të njoftojë se përdorimi i Tylenol-it gjatë shtatzënisë mund të kontribuojë në rrezikun e autizmit dhe do t'u këshillojë grave shtatzëna ta përdorin atë apo acetaminofenin gjenerik, vetëm për raste temperature të lartë, pohuan për POLITICO dy zyrtarë të administrates amerikane. Zyrtarët, të cilëve u është ofruar anonimiteti për të ndarë paraprakisht detajet e njoftimit, pohuan se Trump do të përmendë gjithashtu si terapi të mundshme për autizmin leucovorinën, një ilaç i përdorur për kancerin dhe aneminë. Të premten, shefi i Shtëpisë së Bardhë u shpreh se së shpejti do të bënte një njoftim të madh mbi këtë çrregullim neurobiologjik: "Autizmi është plotësisht jashtë kontrollit", u tha ai gazetarëve. "Mendoj se ndoshta kemi një arsye pse." Në një deklaratë të dielën sakaq, zëdhënësi i Shtëpisë së Bardhë, Kush Desai, pohoi se "njoftimi do të përbëjë një përparim historik" në menaxhimin e rritjes së shkallës së autizmit. Gjetja e shkakut të këtij crregullimi është një përparësi kryesore e Sekretarit të Shëndetësisë Robert F. Kennedy Jr., i cili premtoi më parë këtë vit se do të vinte me përgjigje në muajin shtator. Këtë pranverë, Qendrat për Kontrollin dhe Parandalimin e Sëmundjeve raportuan se 1 në 31 tetë vjeçarë amerikanë u diagnostikua me këtë gjendje në 2022-shin, krahasuar me 1 në 150 që ishte në vitin 2000. Njoftimi do të shënojë të herën e parë që qeveria amerikane e lidh acetaminofenin apo paracetamolin me autizmin. Kennedy beson se faktorët mjedisorë po shkaktojnë rritjen e rasteve të autizmit – e pavarësisht provave të shumta që tregojnë të kundërtën, ai dyshon se vaksinat janë të përfshira.