Donald Trump dhe Xi Jinping përgatitetin për takimin e shumëmediatizuar mes tyre, mes deklaratave optimiste s inga SHBA, ashtu edhe nga Kina se marrëdhëniet mes tyre kanë qenë përgjithësisht të qëndrueshme në muajt e fundit- dhe synojnë të vazhdojnë t`i mbajën të tilla. Megjithatë, është e gjatë lista e cështjeve delikate që janë në lojë në një nga marrëdhëniet më të rëndësishme në botë, pa ndonjë zgjidhje të lehtë në horizont. Të paktë janë ata që presin përparime të mëdha në mosmarrëveshjet afatgjata mes Kinës dhe SHBA-së, të cilat nisin nga konkurenca teknologjike e deri te situata e ndërlikuar e Tajvanit, aleati kryesor i të cilit është SHBA-ja. Në axhendë pritet të përfshihet edhe përfundimi i luftës me Iranin, ku Pekini po luan rolin e një ndërmjetësi jozyrtar në konflikt, shkruan AP. Në parim, vizita shihet si një përpjekje e Trumpit për të forcuar pozitat e tij politike përballë rivalit komunist, ndërsa presidenti kinez Xi Jinping paraqitet i qetë dhe i sigurt. Në një kohë kur ekonomia globale dhe ndryshimet klimatike kërkojnë bashkëpunimin e dy fuqive më të mëdha botërore, një takim mes presidentit amerikan dhe atij kinez konsiderohet thelbësor. SHBA-ja mbetet ekonomia më e madhe në botë, ndërsa Kina renditet e dyta; po ashtu, të dy vendet janë ndër ndotësit më të mëdhenj të planetit. Pekini dhe Uashingtoni duket se janë të vendosur që ky takim të mos përfundojë pa rezultate konkrete. Një marrëveshje mes dy liderëve do të kishte pasoja globale, por njëkohësisht do t’u shërbente edhe interesave të tyre politike të brendshme. Sipas analistit kinez Chu Yin, Trump ka nevojë urgjente për sukses në politikën e jashtme, sidomos përpara zgjedhjeve të mesmandatit në SHBA. Ai vlerëson se strategjia amerikane ndaj Iranit nuk ka dhënë rezultatet e pritshme dhe se tani Trump po përpiqet të arrijë të paktën një marrëveshje të pjesshme me Kinën për tarifat tregtare, teksa Uashingtoni shpreson që Kina të rrisë blerjet e produkteve amerikane, gjë që do t’i jepte Trumpit një argument të fortë politik në prag të zgjedhjeve. Negociatorët e të dy vendeve pritet të zhvillojnë bisedime në Seul përpara takimit të liderëve.