Ekipi ligjor i ish-presidentit Donald Trump po pëson një tronditje të konsiderueshme pas aktakuzës së tij në hetimin e dokumenteve të klasifikuara. Në një lëvizje të papritur, Trump njoftoi se po largoheshin dy nga avokatët e tij kryesorë, Jim Trusty dhe John Roëley, nga çështja. Ndër të tjera ish-lideri amerikan shtoi se tashmë Todd Blanche, një avokat mbrojtës që ai punësoi në prill pasi u padit në Manhattan, do të vijonte me çështjen përkohësisht. Menjëherë pas kësaj, Trusty dhe Roëley lëshuan një deklaratë të përbashkët në të cilën ata thanë se po jepnin dorëheqjen tërësisht nga ekipi ligjor. Ata njoftuan se ishin të bindur se Trump do të shfajësohet në betejën e tij ligjore e cila vijon prej kohësh, teksa theksuan se nuk planifikojnë të dalin në media apo të zbulojnë bisedat që kanë pasur me Trump. Trump përballet me shtatë akuza penale në lidhje me trajtimin e materialeve të rëndësishme qeveritare që mori me vete kur u largua nga Shtëpia e Bardhë në janar 2021. Hetuesit sekuestruan rreth 13,000 dokumente nga pasuria e Trump në Mar-a-Lago në Palm Beach, Florida, gati një vit më parë. Aktakuza e një ish-presidenti amerikan është e paprecedentë në historinë amerikane dhe shfaqet në një kohë kur Trump është kandidati kryesor për president vitin e ardhshëm. Rasti nuk e pengon Trumpin të bëjë fushatë apo të marrë detyrën nëse do të fitonte zgjedhjet presidenciale të nëntorit 2024. Ekspertët ligjorë thonë se nuk do të kishte asnjë bazë për të bllokuar betimin e tij edhe nëse ai do të dënohej dhe do të dërgohej në burg.