Edhe një herë, bisedimet për fundin e luftës SHBA-Iran në Islamabad, po rrethohen nga paqartësia. Presidenti i Shteteve të Bashkuara, Donald Trump, njoftoi se ka anuluar udhëtimin e delegacionit amerikan drejt kryeqytetit pakistanez, Islamabad, për bisedime me Teheranin, pasi ky i fundit nuk konfirmoi pjesëmarrjen. “Sapo anulova udhëtimin e përfaqësuesve të mi që do të shkonin në Islamabad të Pakistanit për t'u takuar me iranianët. Shumë kohë e humbur duke udhëtuar, shumë punë! Përveç kësaj, ka një grindje dhe konfuzion të madh brenda "udhëheqjes" së tyre. Askush nuk e di se kush është përgjegjës, përfshirë edhe ata. Gjithashtu, ne i kemi të gjitha kartat, ata nuk kanë asnjë! Nëse duan të flasin, e tëra çfarë duhet të bëjnë është të telefonojnë!!!” Ministri i jashtëm i Iranit, Abbas Araghchi, ndodhet në Islamabad, por Teherani insiston se vizita është pjesë e një turi rajonal me tre ndalesa dhe se nuk ka në plan të zhvillojë negociata të drejtpërdrejta me palën amerikane. Araghchi është takuar me kreun e forcave të armatosura të Pakistanit, Asim Munir, dhe thotë se paskësaj, do të udhëtojë drejt Omanit dhe Rusisë “për konsulta mbi zhvillimet rajonale". Pala iraniane ndërkohë ka paraqitur kërkesat dhe shqetësimet para ndërmjetësve pakistanezë në lidhje me propozimet e Shteteve të Bashkuara. Sipas burimeve, Irani vazhdon të insistojë që amerikanët të vendosin një fund të bllokadës së Ngushticës së Hormuzit si kusht paraprak për hapjen e raundit të dytë të negociatave. E ndërsa përpjekjet diplomatike për një zgjidhje të konfliktit vazhdojnë, në të njëjtën masë vijon edhe presioni amerikan për t`i detyruar kundërshtarët të bëjnë lëshime. Administrata amerikane vendosi të ngrijë 344 milionë dollarë në kriptovaluta të lidhura me Iranin, e pohuar kjo nga sekretari i Thesarit të Uashingtonit, Scott Bessent.