Serbia vijon të jetë e trazuar nga protestat masive të dhjetëra mijëra studentëve e qytetarëve, edhe pas dorëheqjes së kryeministrit Millosh Vuçeviç. Pas dy ditësh marshimi, studentët mbërritën këtë të shtunë në Novi Sad, duke bllokuar tri urat mbi lumin Danub, fiks tre muaj pasi 15 persona humbën jetën, si pasojë e shembjes së një strehe betoni në stacionin hekurudhor të këtij qyteti, i dyti më i madhi në Serbi. Me moton “Tre muaj-tre ura”, dhjetëra mijëra njerëz u mblodhën në Novi Sad, duke bllokuar urat Varadin, Zhezhele dhe atë të Lirisë, bllokadë që do të zgjasë deri të dielën pasdite. Gjatë udhëtimit prej 80 kilometrash për në Novi Sad të enjten dhe të premten, studentët nga Beogradi u përshëndetën nga qytetarë që u binin borive të makinave ose dolën nga shtëpitë e tyre për të ofruar ushqim dhe pije. Qindra njerëz me biçikleta dhe motoçikleta u nisën veçmas drejt Novi Sadit të premten, ndërsa shoferët e taksive të Beogradit thanë se do të shkonin atje gjithashtu për t’i kthyer studentët në shtëpi të dielën. Studentët e universiteteve morën rolin kryesor në protestat që janë shndërruar në sfidën më serioze në vite për udhëheqësin e fuqishëm të vendit, Presidentin Aleksandar Vuçiç. Përveç Novi Sadit dhe Beogradit, protesta të përditshme dhe bllokada të trafikut janë mbajtur në gjithë Serbinë, pasi protestuesit besojnë se tragjedia në Novi Sad është pasojë e korrupsionit qeveritar në një projekt të madh infrastrukturor me një kompani shtetërore të Kinës.