Kancelari Olaf Sholz shkarkoi ministrin e Financave Christian Lindner. Kjo lëvizje e tij konfirmoi ndarje të thella mes partive të koalicionit qeverisës në Gjermani, të përbërë nga SPD-ja, Të Gjelbrit dhe FDP-ja. Vendimi u konfirmua të mërkurën në mbrëmje nga zëdhënësi i qeverisë në Berlin, ndërsa Kancelari Scholz e shpjegoi këtë vendim duke e lidhur me buxhetin, ekonominë dhe mosmarrëveshjet brenda koalicionit. Më 15 janar kancelari do të paraqesë kërkesën për votëbesim në Bundestag. Christian Lindner, i cili ka kërkuar prej kohësh reforma të thella në ekonomi dhe në politikat fiskale të Gjermanisë, propozoi zgjedhje të reja, duke thënë se koalicioni aktual nuk mund të sigurojë stabilitetin e nevojshëm. Ai gjithashtu ka kërkuar që të gjitha partitë të dakordësohen për një proces të qetë zgjedhor në fillim të vitit 2025.