Një ngjarje e rëndë ka ndodhur në një supermarket në Kiev, kryeqytetin e Ukrainës. Një person i armatosur ka hapur zjarr në rrugë, dhe më pas ka hyrë brenda marketit, duke marrë peng një numër të madh qytetarësh. Ai ka qëlluar me armë fillimisht në rrugë, dhe më pas brenda biznesit, duke vrarë pesë persona dhe plagosur disa të tjerë, ndërsa u qëllua për vdekje nga policia. Sipas autoriteteve, dy persona janë gjetur të pajetë në një lagje të kryeqytetit, ndërsa pesë të plagosur janë transportuar në spitalet e Kievit. Mes tyre ndodhet edhe një fëmijë, i cili është dërguar me urgjencë për trajtim mjekësor, si dhe disa të rritur që po marrin ndihmë në vendngjarje. Një roje sigurie i supermarketit raportohet gjithashtu i plagosur. Dëshmitarë nga vendi i ngjarjes raportuan për momente paniku, ndërsa askush nuk ishte lejuar të largohet nga ambientet e biznesit. Forca të shumta policie dhe njësi speciale rrethuan zonën, në një operacion të gjerë për neutralizimin e autorit, i cili u qëllua për vdekje, pasi nuk pranoi të dorëzohej. Në një reagim për ngjarjen, presidenti Volodymyr Zelensky tha se në spital ndodhen 10 persona. “Të gjithë po marrin kujdesin e nevojshëm mjekësor. Katër pengje u shpëtuan. Hetimet po vazhdojnë. Hetuesit e Policisë Kombëtare dhe Shërbimit të Sigurisë së Ukrainës po punojnë”, tha Zelensky. Ngjarja vjen në një kohë kur autoritetet janë ende në alarm pas një incidenti të ngjashëm në Odessa, ku një person i armatosur hapi zjarr ndaj kalimtarëve, pa shkaktuar viktima.