Komuniteti ndërkombëtar i shahut është tronditur nga lajmi i ndarjes nga jeta të mjeshtrit të madh amerikan Daniel Naroditsky, i cili ndërroi jetë papritur në moshën 29-vjeçare, vetëm dy javë para ditëlindjes së tij të 30-të. Lajmi u konfirmua nga Qendra e Shahut në Charlotte, ku Naroditsky ishte trajner dhe anëtar aktiv. Shkaku i vdekjes nuk është bërë publik. Në një deklaratë zyrtare, klubi i tij shprehu “hidhërim të thellë” për humbjen e një figure që “inspironte në mbarë botën”. “Daniel ishte një shahist i talentuar, komentator dhe edukator, i admiruar nga tifozët dhe lojtarët në çdo cep të globit,” thuhet në njoftim. Ndër figurat që shprehën ngushëllime ishte edhe mjeshtri i madh Hikaru Nakamura, aktualisht amerikani numër dy në botë, i cili shkroi në rrjetet sociale: “Jam i shkatërruar. Kjo është një humbje e madhe për botën e shahut.” I lindur në Shtetet e Bashkuara, Daniel Naroditsky nisi të luante shah në moshën gjashtëvjeçare, pasi u njoh me lojën përmes vëllait të tij më të madh, Alan. Në moshën 12 vjeç, ai fitoi Kampionatin Botëror për të Rinj nën 12 vjeç në Antalia të Turqisë, duke u cilësuar si një talent i rrallë. Vetëm dy vjet më vonë, në vitin 2010, botoi librin “Zotërimi i Shahut Pozicional”, një tekst i vlerësuar për analizat e thella dhe aftësitë strategjike. Në vitin 2013, ai fitoi Kampionatin Amerikan për të Rinj, çka i hapi rrugën për të marrë titullin “Mjeshtër i Madh Ndërkombëtar” (Grandmaster) nga Federata Botërore e Shahut Naroditsky ishte gjithashtu një figurë shumë e dashur në komunitetin online të shahut. Kanali i tij në YouTube arriti rreth 500 mijë abonentë, ndërsa transmetimet e tij në Tëitch ndiqeshin nga mbi 340 mijë ndjekës. Humbja e tij ka lënë një boshllëk të madh në botën e shahut dhe në zemrat e miliona adhuruesve në mbarë globin.