Kremlini pretendon se ka parandaluar një sulm me dron nga Ukraina ndaj rezidencës së presidentit rus, Vladimir Putin. Zelensky e cilësoi këtë pretendim si një “gënjeshtër tipike ruse”, duke theksuar se bëhet fjalë për një skenar të fabrikuar për të justifikuar sulme të reja kundër Ukrainës. Sipas tij, Moska po përdor sërish narrativa të rrezikshme për të sabotuar përpjekjet diplomatike me Shtetet e Bashkuara, që synojnë t’i japin fund luftës. “Historia e supozuar e një sulmi ndaj rezidencës së Putinit është një trillim i plotë. Ajo synon të justifikojë bombardime të mëtejshme ndaj Ukrainës, përfshirë Kievin, dhe të shmangë përgjegjësinë e Rusisë për përfundimin e luftës”, deklaroi Zelensky. Nga ana tjetër, ministri i Jashtëm rus, Sergei Lavrov, pretendoi se Ukraina kishte tentuar të godiste rezidencën e Putinit në rajonin e Novgorodit, ndërsa mbrojtja ajrore ruse kishte rrëzuar 91 dronë. Ai paralajmëroi se “veprime të tilla do të marrin një përgjigje të ashpër”, duke folur për sulme hakmarrëse tashmë të planifikuara. Vetë Trump, duke folur nga rezidenca e tij Mar-a-Lago, pranoi se lajmi e kishte zemëruar. “Sot mësova për këtë nga Presidenti Putin. Është një gjë ta kritikosh publikisht dhe një gjë tjetër të sulmosh shtëpinë e tij. Nuk është koha e duhur për të bërë asgjë nga këto.”, deklaroi Trump Ndërkohë, Zelensky konfirmoi se gjatë bisedimeve me Trump, SHBA-të i kanë ofruar Ukrainës garanci sigurie për një periudhë 15-vjeçare, megjithëse çështja e rajonit lindor të Donbasit mbetet e pazgjidhur.