Kryeministri i Izraelit, Benjamin Netanjahu, kërkon që palestinezët të krijojnë shtetin e tyre në Arabinë Saudite, duke hedhur kështu idenë për shpërnguljen e përhershme të tyre. Deklarata e Netanjahut vjen pas propozimit të Presidentit amerikan, Donald Trump, për rindërtimin e Rripit të Gazës, duke larguar prej andej banorët palestinezë. “Sauditët mund të krijojnë një shtet palestinez brenda Arabisë Saudite. Kanë hapësira të bollshme atje”, tha Netanjahu, në një intervistë për një televizion izraelit, gjatë vizitës në Uashington, duke shuar çdo shpresë se do të pranojë që izraelitët dhe palestinezët të jetojnë në dy shtetet ngjitur me njëri-tjetrin. “Një shtet palestinez pas 7 Tetorit? E dini ç’do të thotë? Ishte një shtet palestinez i quajtur Gaza nën qeverisjen e Hamasit dhe i shihni pasojat”, shtoi kryeministri izraelit. Arabia Saudite refuzon të vendosë marrëdhënie diplomatike me Izraelin, nëse nuk lejon krijimin e shtetit palestinez, pavarësisht se në këtë intervistë Netanjahu shprehu bindjen se Riadi zyrtar do të pranojë shkëmbimin e ambasadorëve. Netanjahu e mbështeti propozimin e Donald Trampit, i kundërshtuar gjerësisht nga komuniteti ndërkombëtar për shpërnguljen e banorëve të Rripit të Gazës në funksion të rindërtimit, ndonëse shefi i Shtëpisë së Bardhë nuk ka sqaruar nëse plani i tij parashikon rikthimin e tyre pas përfundimit të këtij procesi.