Ukraina po përgatitet për bisedime të reja paqeje në Shtetet e Bashkuara, ndërsa presidenti Volodymyr Zelensky shpreh shpresën që garancitë e sigurisë dhe një “Paketë e Prosperitetit” të nënshkruhen gjatë Forumit Ekonomik Botëror në Davos javën e ardhshme. “Shpresoj që garancitë e sigurisë të SHBA-së të nënshkruhen në Davos,” deklaroi Zelensky gjatë një konference për shtyp me presidentin çek, Petr Pavel. Ai shtoi se megjithëse Ukraina dhe Shtetet e Bashkuara nuk janë gjithmonë në të njëjtën anë për disa çështje, kjo është e kuptueshme, pasi ai po mbron interesat e shtetit të tij. “Megjithatë, kemi bashkëpunuar shumë mirë me SHBA-në dhe presim që dokumentet të finalizohen në margjinat e forumit,” shtoi ai. Një delegacion ukrainas është aktualisht në udhëtim drejt SHBA-së për të zhvilluar bisedime të mëtejshme mbi këto çështje, sipas “The Guardian”. Ndërkaq, situata në frontin ushtarak mbetet shqetësuese. Sipas inteligjencës ukrainase, Rusia po përgatitet për sulme të reja masive. Përveç kërcënimeve ushtarake, Ukraina përballet edhe me një krizë të rëndë energjetike për shkak të bombardimeve ruse. Ministri i sapoemëruar i Energjisë, Denys Shmyhal, njoftoi se përgatitjet për dimër kanë dështuar në disa qytete dhe rajone. “Situata është shumë e vështirë. Në këto dy ditë të mandatit tim, kam parë se shumë gjëra kanë ngecur.” tha ai gjatë një ore pyetjesh në parlament.