Pas vdekjes së 36 vjeçares shtatzënë nga Pogradeci Marjana Karoli ka nisur hetimi për tre mjekë të maternitetit të Pogradecit nën akuzën e neglizhencës mjekësore. Ngjarja e rëndë ka ndodhur më 30 gusht, kur e reja, e cila ishte në muajin e shtatë të shtatzënisë, është paraqitur në gjendje të rënduar shëndetësore pranë spitalit të Pogradecit. Pas ekzaminimeve të para, dhe qëndrimit për disa orë në spitalin e Pogradecit, bluzat e bardha vendosën dërgimin e saj me autoambulancë drejt Tiranës për ndihmë më të specializuar. Por gjatë rrugës, për shkak të përkeqësimit të menjëhershëm të gjendjes, automjeti i urgjencës është detyruar të futet në spitalin e Elbasanit, ku mjekët konstatuan se 36-vjeçarja kishte ndërruar jetë. Sipas të dhënave të Policisë Specialistët për Hetimin e Krimeve në Komisariatin e Policisë Pogradec kanë referuar materialet në Prokurori, duke nisur procedimin penal për tre mjekët Blerta Delija kirurge gjinekologe, Samir Cela kirurg, Anri topi reanimator të cilët u përfshinë në trajtimin mjekësor të saj. Ndërkohë priten rezultatet e mjekësisë ligjore për të përcaktuar shkakun e vdekjes të 36 vjeçares.