Një ngjarje tragjike ka ndodhur në liqenin e Banjës në Gramsh, ku për pasojë dyshohet se kanë humbur jetën katër persona. Burime për Top Channel, bëjnë me dije se viktimat janë nga fshati Cingar i Gramshit. Babai Gazmend Zogu 46 vjeç me dy djemtë e tij E. Z 14 dhe R. Z. 19 vjeç, si dhe kushëriri i tyre 20 M. Z. vjeç, të cilët sipas deklarimeve të familjarëve, janë futur në liqen për tu larë dhe nuk kanë dalë më. Sipas policisë së Gramshit ata kanë marrë një telefonatë rreth orës 19:00, ku i është thënë se 4 persona dyshohet se janë mbytur në Liqenin e Hidrocentralit të Banjës, në fshatin Drizë të Gramshit, tek shkolla e vjetër Shërbimet e policisë, grupi hetimor dhe zjarrfikësit kanë shkuar në vendngjarje, ku rezulton se kanë humbur jetën babai me dy djemtë e tij dhe kushëriri i tyre. Grupi hetimor ka gjetur në buzë të liqenit dy motoçikleta, tre celularë dhe rrobat e trupit. Sipas policisë në drejtim të liqenit janë nisur polumbarët e Reneas për të bërë të mundur gjetjen dhe nxjerrjen e katër shtetasve nga liqeni. Në drejtimin e Prokurorisë, grupi hetimor vijon punën në vendngjarje për sqarimin dhe dokumentimin e plotë të rrethanave të ngjarjes. Po ashtu dy persona kanë humbur jetën ditën e sotme pas kontaktit me ujin. Njëra ngjarje ndodhi në plazhin e Durrësit ku një 68-vjeçar në Porto Romano rreth orës 19:20 sapo ka rënë në kontakt me ujin ka shfaqur probleme shëndetësore, ku ka gjetur vdekjen. Ngjarja tjetër ndodhi në plazhin e Tales ku humbi jetën një 52-vjeçar. Po ashtu dyshohet se pushuesi humbi jetën nga i njëjti shkak.