Një djalë 2-vjeçar shqiptar në fshatin Agios Leontas të Zakintos të Greqisë, humbi jetën pasi u sulmua barbarisht nga një qen PitBull. Babai i djalit tha për mediat greke se ishte njoftuar për ngjarjen nga e bija dhe ka vrapuar për të ndihmuar të birin. Çifti shqiptar, i cili ka edhe dy fëmijë të tjerë, ishte nisur për të blerë furnizime për shtëpinë. Kur bashkëshortët u kthyen pak pas mesditës, djali i vogël i shpëtoi vëmendjes dhe shkoi drejt pemës ku ishte lidhur një qen, që e sulmoi duke i shkaktuar lëndime të rënda. “Qeni ishte endacak, e kishin lëshuar dhe e morëm ne, sepse njerëzit në fshat bërtisnin se do u sulmonte kafshët. E mora që të kishte një vend për të qëndruar dhe kafshoi fëmijën tim, i cili mbylli sytë”, deklaroi babai i djalit për mediat greke. Prindërit e cuan djalin në Spitalin e Përgjithshëm të Zakynthos-it, ku mjekët luftuan për t’i shpëtuar jetën, por nuk ia dolën dot. Autoritetet greke po hetojnë rrethanat e sulmit, ndërsa prindërit e të miturit që humbi jetën nga kafshimi i qenit, po mbahen në paraburgim.