Një aksident tragjik me pasojë vdekjen e gazetarit Enrik Mehmeti është regjistruar mbrëmjen e të shtunës në plazhin e Porto Novos, pranë Dalanit, në Zvërnec. Sipas informacioneve paraprake, Mehmeti po lëvizte me një motor sportiv, kur dyshohet se, për shkak të një manovre të gabuar, humbi kontrollin e mjetit. Si pasojë, motori u rrokullis disa herë, ndërsa gjatë aksidentit një pjesë metalike e mjetit e goditi në kraharor, duke i shkaktuar dëmtime të rënda. Menjëherë pas ngjarjes, ai u transportua me urgjencë drejt Spitalit Rajonal të Vlorës, ku mjekët bënë përpjekje për t’i shpëtuar jetën. Megjithatë, për shkak të plagëve të marra, ai nuk arriti të mbijetojë. Burime paraprake bëjnë me dije se viktima kishte pësuar dëmtime të shumta në kraharor dhe në organet jetësore, të cilat rezultuan fatale. Në vendngjarje mbërritën shërbimet e Policisë, të cilat kryen veprimet e para hetimore dhe kanë nisur hetimet për të zbardhur rrethanat dhe shkaqet e plota të aksidentit. Lajmi për ndarjen nga jeta të gazetarit 40-vjeçar Enrik Mehmeti ka tronditur kolegët, miqtë dhe të afërmit e tij.