Numri i të vdekurve nga shembja e çatisë së një klubi në Santo Domingo është rritur në 218, sipas të dhënave të fundit të autoriteteve, ndërsa shpëtimtarët kanë humbur çdo shpresë për të gjetur të mbijetuar në rrënoja. Ekipet e shpëtimit aktualisht janë duke u fokusuar kryesisht në gjetjen e trupave. Që prej ditës së martë askush nuk është gjetur i gjallë nën rrënoja. “Fatkeqësisht janë 218 të vdekur, bazuar në të dhënat paraprake”, tha drejtori i Qendrës së Operacioneve Emergjente, Juan Manuel Mendes. Dhjetëra njerëz janë grumbulluar rreth klubit, në spitale dhe morg, në pritje të informacioneve për të afërmit dhe miqtë e tyre të zhdukur. Ngjarja ndodhi në orët e para të së martës në një koncert të këngëtarit të njohur të merenguesit Rubby Pérez në klubin e natës Jet Set. Ai ishte në mesin e të vrarëve në incident, tha menaxheri i tij. Jet Set ishte një klub nate popullor në Santo Domingo, i cili organizonte rregullisht koncerte me muzikë kërcimi. Të pranishëm natën e tragjedisë ishin politikanë, sportistë dhe figura të tjera të shquara. Në rrjetet sociale qarkulloi edhe një regjistrim audio kur një burrë që qëndronte pranë skenës dhe dëgjohej duke thënë se “diçka ra nga tavani”, ndërsa tregon diçka drejt çatisë. Më pak se 30 sekonda më vonë, dëgjohet një zhurmë e madhe.